Malem asida leiriba mee khudingmak amaga amaga saktam amadi khonjel khennei haibasi eikhoi pumnamakna khanglaba wamfam amani. Khennaba kayagi maraksida pa amasung pi haibagi khennaba amasu khunnai asina semduna makhoigi thoudang kaya khennana thamduna yaba yadaba, touheiba touheidaba haina khaidoktuna, masina chatnabi oiduna lakli. Adubu pa amasung pi anisi nattaba meihouroldagi eikhoina uduna laklaba nongmatasu thoina khanjinludaba masing yamjadrabasu apikpa kanglup oirabasu eikhoigi erakta adumak totna tinana hingduna laklaba nupi maanbi amadi nupa maanba singi thousilna kadaida kanana manghankhraba? Makhoisu leifamdi thokee khunnai asida hingduna lakpa kanglupni, natragana makhoi sing ase masing yamdaba kanglupni haiduna namsinduna thamlabara haibasidu wahang ama ni. Adubu India gi khwaidagi awangba thaki wayel loisng oiriba Supreme Court nadi houkhiba chahi 2014 April gi tang 14 da wayel piduna makoibu nupa , nupi natraga transgender haina saktakchaba yahankhibaga loinana third gender haina kanglup ama semduna makhoibu sak khangkhare amasung makhoigi ngaklou kaya pinaba centre amadi Manipur leingak ta khanghankhibasu leikhre.
Adubu eikhoigi eramdam oiriba Manipur sidadi makhoigi hingbagi thak kayamna wanglabage amadi khunaina makhoibu kadai faoba yaribage, makhoigi hak kadai faoba piribage haiba makhoibu nungsibiba meeoi kharana natana kananasu neinarude. Nupa maanba nataraga nupi maanbi hairiba kanglupse taibangpal asida lakpa khongdarakpada khunnai asina nupa natraga nupini haina lourabasu inkhatlakpa matamda nupa natraga nupigi mawong adu khennana utlaki. Mapung marei faraklaba matamda masana masagi saktak transgender haina takcharaki. Lamdam asigi puwari dasu ningthou pallingei matamda ‘feita’ haina sak khangnaduna ningthou konda wayel thouda yaorambagi, ningthougi pakhon chatlambagi lai tin gi oiba thabak thouram kayada saruk yarambagi wari ngasisu eikhoina ariba lairik khayada thengnari. Adubu nupa amadi nupi anigi khennaba chaona thamliba nupana khullingba ngasigi khunnai asidadi makhoibu leibaki oiba laining laisong ga mari leinaba thabak thouram kayadagi asum asum inthorakpagi maong maanba thouwong ama chahi kharagi mamangdagi urakli. Masigi mayek laaraba khudam haibabu Umang Lai Kanba Apunba Lup (UKAL) na Waiton amadi Khundrakpam da pangthokhiba tongan tonganba lai haraobagi thouramda nupi maanbisingbu laibou chongba yaoba thingkhibaduni. Makhoibu nupa oina poklaga nupigi fee setpagi laigi thougal touba yaoba yade hairabadi makhoibu laina karigi semliba. Makhoisu laina semba natte haibadi karida yumfam oiraga haigadouriba aduga tousanaba sajannabani haibasu ngasigi medical science nasu yaroi. Adudi karigi makhoibu inthok kadouriba. Karigi ngasigi khunai asina nupa oina pokcharabasu masana masabu nupini haina saktakcharaba, nupigi maong matou amadi fijet settuna hingliba meeoi kanglup amabu lai haraoba hairiba Meitei eikhoigi tatna thana yadraba thouram asidagi inthoknaba hotnariba.
Laining laison ga phurup amagi saktam ga achetpa mari leinei. Adunani malemgi achouba inak khunba leibak kayana sel kaya tingduna makhoigi laining sandoknaba hotnariba. Laining laisonda natki oiba thabak thouramba athingba thamba amadi changjafam pidabana maram oiduna masing yamdrabasu makhoi kharasina atopa laining amada hongduna furup amada asum asum tinkhiba tarabadi kanagi mangjaba oigani kanana madugi afa-fata du pugani ? Laining da yumfam oiduna malemgi tongan tonganba mafam kayada lan soknariba asigum piklaba phurup asidagi machet machet khaidoklabadi houjik eikhoina laoriba kholao “apunbagi saktam” karamna sagatkadouriba?
Wareng asi Anouba Meerol gi 2019 gi December thagi chefong da phongjakhibani.
Ruth Chawngthu