Manipurda meihourol dagi houna leibakki ehou kayada nupisingna achouba thoudang louduna lakli. Ehou kaya asigi khongthang khudingda makhoigi mafam kadaida leibage amasung khunnai asida makhoi karamba thakta leiribage haibasisu khananingai oiba wafam singni. Wafam ani asigi matangda amasung ani asigi leinariba mari gi matangda Ema Nganbi ga wari sanaduna maru oiba wafam kaya khangba fangjakhi. Makhada thamjaribasi Ema Nganbi ga unaduna wari sanarubadugi tangkak kharani.
Anouba Meerol: Ema Nganbi na Manipur gi ehou gi khongjang asida karamba kandagi amasung kamaina yaorakpano?
Ema Nganbi: Angang oiringeidagi houna rally chatpa leibakki thoudok wathok kayada saruk yaba hourak-e. Aduga tasengna ehou asida mayek sengna yaorakpadi 1974 da Imphal College tagi B.Sc loiraba matungdagini. Matam aduda eikhoi leisabi mayam punsillaga district ki oiba nupigi Nuja Luching Marup kouba lup ama lingkhatkhi. Lup asi khunnai asigi chatna pathap oina emung manungda nupabu tungi yumbirenni haiduna lairik tamba thaba aduga nupi singbuna phi saduna yumgi thabak touhanduna thamba asi asum leiragadi nupi sing asi adum hanthaduna leiba tare haibadagi houdokhibani. Adudagi tampakta AFSPA thamjillakpa matung 1980s aduwaida army na commando na mee phuba-cheiba toina tourakpa, nungdangda nupa amatta thokpa ngammaktaba, nupigi ekai khumnaba khongoinaba, mee mayam thiba khangdana mangkhiba kaya hourakpadagi rally chatpa, wakat meefam phamba hourakhi. Yamna kanna ehou asida yaorakpana erang yamna kankhatlakpa matam 1997-1999 dagini, aduga 2000 aduwaidagi UCM semmak aba matungda ei esamaksu UCM gi External Affairs term ahum lak purammi.
Anouba Meerol: Ehou kankhatlakpa matamdudagina hujik phaobada nupi gi thoudang asi lambi sorok ta thokpada nattana atei atoppa thoudang sing ehou asida louduna lakhibage?
Ema Nganbi: Nupi gi thoudang asi Manipur dadi adukki matik chaokhre. Nupa gi thoudang na akhang ahei saba, lairik tammuriba adu takpa, adubu kathokpa, thammoi sengna laobadadi nupi gi thoudang adukki matik chao-e. 2001 gi June 18 gi ehou aduda nupa mayam da atamnana nongmei kappakpagi nupana henna sibani, thoklakpadi nupina henna thok ebani. Kiba khangdaba, meena henjinba yadaba, sini naani khangdana, leibakki damak chongthokpa asi nupi singda chuduna leirabani. Adubu lairik heitragadi meena adum namthaba tabani. Manorama gi tangkak, mee mayam hatkatlakpagi tangkak, nungdangda mapan thokpa ngamnaraktaba matam dagi houna nupi singsina adum chongthoktuna laklabani. Nupi sing asidi leikaida phaoba mee phunaba matamda magi nupa soktoi saruk, macha soktoi saruk ei sokchage haina khwangchet setlaga chongthokpa ngaktani.
Anouba Meerol: Manipurgi thoudok wathok singda aruba warep lourakpa (decision making) matamda amasung ehou sing asi luchingba da nupi gi thoudang asigi matangda kari haibiningbage?
Ema Nganbi: Hujik Manipur da nupi sing asi aruba warep loubada yaohandaba amasung khutlai oina sijinnabadouna touri. Masi karigino hairagadi nupa singsida heinabi oina wakhalda adum nupana khullingba lamni, emungidi nupana makokni haiba wapham asi leibanani. Nupagi koksida nupina eikhoidagi ethak thongallakpa yaroi haibasi adum lei. Poklakpadagi yaoraklabani, haibadi angang ama semmakpada mama-mapa gi wakhal adu changakpani. Mama aduna mapa adu lai oina ningibani aduga nupa asina eina touningbata toudouribani, nangna lam henba yaba natte haina leiribani. Asumna koksida yaoraga laklabanina angang singdasu asigumba wakhallon asi mami taribani. Adubu nupiga nupagasi chap mannei, keida khennei hairagadi sawong sadada khaktani. Nupidi adei henna khanba yade, nupana sidagi henna khangadabani heigadabani haiba leite.
Leikaigi club ta nupi yaoramde, lai haraobada nupi da pham achouba piba natte, peisa khaiba gumba, laigi thadoknaba pot khairucho haibagumba, lai pubagi mee thirucho haibagumba, makup mata se touhalle. Lai committee gi secretary president di nupi da paihanponte nupa na loina pairibani. Nupise phanayam singasu khunnai asina adum manghalli. Lousing tansingadaba matamdana nupa singsibuna yumgi mapuni, tungi yumbini haidana adum ingkhatpa aduga nupi singna phi saduna, thabak sudana nupa lairik tamba thaba. Aduna doctor amana heiridu yumda phi saribadunadi kamai heini? Engineer amana heiridu loubukta lou ling chatlibi nupiduna kamaina heini? Nupising asi leibak ki warep loubada yaohangadabani haidana eina university da chatlaga ngangba ngamgadaba natte. University gi thak yourak adi lairik heiba thirakkadouribani. Aduna nupise kadaida tollamge haibada lairik tamba sida tollamme. Lousing tanbagi saruksida khunnaisina nupi singse wathalle. Nupina lairik tambasi mangi kaina tamhallamponte.
Warep sing loubada nupi yaodriba asi nupa singsina adum namtharaga thamningba, aduga nupisingbu semgat sagatpagi thaksisu youdriba. Aduga lairik laisu heirabi nupisingna tolop charabanina sigumba laoba khongbagi thabakse amuk yaoningdaba. Eikhoidi sirasu sirage ana chongthorak abani. Adeidi nupasingsina “ema, adeida minister unarucho, agitation chatlucho” hairani adubu warep sing louramdaidadi yaohande. Thabak ama chatnaruraba matungda ema nungna si chatlurabanina, ebemma nungna si chatlure, eina si chatlure adudi warep asi kari lousige, hayeng government natraga minister unaba matamda kari warep lousige haina khannade. Ngaihak ngaihakki thadok aga loisinbagi pot oina touwe. Ema singsinasu saoraga “makum pubana eikhoina puraga noina warep louba” haidana laore. Aduga nupa singsina “khangdi khangdana” ana hairaga adum chamamnaraga leire. Khangnabagi lairik heitrasu eba paba di khara khara thok e banina “ema si sumaina tousi, ebemma sumaina tousi, horen mee unaba matamda emana sigi point si haibirak u, ebemma nungna si pointsi hairak u, ebungo nungna sigi pointsi hairak u” hairaga warep adu louradi phadouba. Horen ngangnaruraga pheireng tureng tourakkani haidana adum touraga leibasida emasingse waroure. Tinnadaba khomjindaba asina maramni.
Anouba Meerol: Asumna thabak oina toubadana nupina mayam touraga warep na nupa na leppagi mawongsi emung manungda leinariba phibham asiga kayam mannabage?
Ema Nganbi: Emung manungdasu awaat-apa neinaba matamda nupi-nupa animak punlaga warep louminnagadouribani. Nupa dusu warep louba ngammaktaba matamda nupi duda hangibani. Nupiduna lairik heijadragasu kok puthoraki bani. Aduna hujik ahansingna nupisingse warep loubagi khannabada yaohande hairise sumaina warep louramdaisida nupise hekta khattharammi. Nupi haidokpa lakpadaphaoba nupi duna eina wa ama hainingi haibada “nupi nung ngaikho, nupi nung wa ngangakkanu” hairini. Horen nupa singdu chatkhrakandudadi ngasaigidu kamaina tousige ana nupi duga amuk tanaribani. Matomtana ngamba natte. Adu khango haibanida ema singna hairise. Nupasingsigi koksida ema singsigi mafam amatangdi thambadu pambagi wanida. Aduna eikhoi lairik heitabadagi nupasingsina namhatlini, eikhoi lairik tamsi, thisi-humsi haina hairise. Nupa singsina pariba tamluriba singse eikhoisu tammaga paragadi, pangal moina kanba hellagasu, wakhal adudi pakthoklakani. Aduna ningol lairik tambase eidi yaam pamba.
Anouba Meerol: Ehouda yaoriba nupisingsina thengnaba emung manung pubagi awabasing gi matangda wafam kharadang thambiyu.
Ema Nganbi: Nupisingse nungdang khudingi thok ebani. Emung manungi chak-esing loisillam laga madu thoknaba meina semdana sem saribani. Kanagumbana madu thok ae ana hallakpada phubiribani. Aduga eikhoigumbana yum amagi mee amamam thoklak-u ana laoribani. Yumsu puni meira su pairaga thokkani, emungdadi horey horen kanam mateng pangsandrabanina. Nupi se chatkhre hairadi nupadunasu emungdo wai sitpa yaidana. Sigumba wakhal sidi sungyao yaodre. Kanagumba gyan taba midi adum touwi, ado chammagi manungda yum ama anidani. Adudagi nupisingsina meepham yaoba amuk thok ani. Nupa singdi yaobiponte, leirakta phamdana leirani. Meephamdagi hallak ani, aduda chak thengi keigino ana laosinbirani. Chak thongbasi thabak oinasu thanadaba. Chak thongingei matamduda office ki che sudouribani. Office ta che subaduna mee oina uba aduga chak thongbaduna mee oina udabadi yaroi. Chak to thongdradi maa horen hallakpada chak kadaidei chadouri? Ma ngasaidei surirudo hallakpada pop taroidro? Nupiduna chak thongaga thambiramba seba phajana toubibei natro? Adudi nupi dugi ekaikhumanabadu khangadoubane. Aduna warep loubagi matangsida eikhoina pamlibadi pumnamakki pandamdi amattanina, yaoriba meeoi pumnamakna amana amagi thabak-thouram masak phajana khangnaba mathou tai.
Anouba Meerol: Warep loubada yaohanbagi matangsida karamba thabak thouram sing paikhatpa mathou tabage?
Ema Nganbi: Pandamdi amatta oibanina pullap wari saraga, tasillaga wapham asi karamba thakta leire haibadu khanghanba changi. Aduga mayamna pukhatpa yabasi karino, khannaraga changba yaba nupisu changhallaga, horen ema hoigi apamba karino haina mee na hangakpa matamda, ngasai tanakhrabanina adum khumba ngammani. Englishta ngangba Hindi da ngangba haibadudi aheiba amana handokpiraga loire. Governor unabadana nupa amana handokpira loire, chief minister unabadadi meiteilonda adum haiba yare. Adudi toudadana che pisinba chatpa matamda eriba adu karino haibadu mamut tana khanghallagasu chathande. Che asi khak piraga kabak kabak hairaga loisille. Adunadi oiba yade.
Anouba Meerol: Nupi singbu warep loubada yaohandaba, wari watai mayek sengna khanghandaba amasung sabidaba asina ehou asida porakliba akaiba singi matang da wafam kharadang thambiyu.
Ema Nganbi: Wari phajana sabidaba, warol mayek sengna taktabasina horen Governor na natraga minister na wa hangakpada ema sing adu khumba ngamde. Adudagi press na amuk phujillakpa matamda che adu uhandrabanina ema khoisu ngangba ngamde. Eibudi khara khangbaduda ngamnanaba hekta ngangi. Adudi mee khudingmakta leibadi natte. Aduna eina hairidi englishta eriba adu meiteilonda wahei khudingmakki artha handokkadabani. Changiba pottu karino haibadu khanghangadoubani. Eriba sing adu emasingduda neira neiraga mayek sengna takpibada kaodourise khara khaktani. Emasingsi lairik heigera heiroigera mathouna leina thoklak ebani. Aduna changbada mai paknaba thabaktudi moina sinnagadoubani. Lairik heitrasu kok ti loina leinarini aduna kokta hanjinbiba ama changi. Lairik heibana erak eba pot adu emasingduda phajana mamut tana piraga tanaragadi loina epha phagadaba. Tanadrabanina asoibase aduda houre. Yongchak aloo eronbada kari kari machan thakpa haiba khangibasi kokta hanjin khibaduna natro? Khangdaba mayang amada erollo haidana pisilluradi kari thaktoino khangoi. Eikhoigi chatnarakpagi oiba pot ama lakpaduna khangini. Ema singse sijinnage hairadi sijinnagadabani leibakki damakni matang matang yengaga. Adubu mamut tana chathallo aduga madu neinarakpa matamda masigi thaksida leire, eikhoina wari sanabada ema khoisu yaobiyu haidana haigadoubane. Lairik heitabanina horen soirakkani haina khallagasu, tamkhiba matek ani-ahum di khanganidana. Wa phao nganghandragasu, matek amatang phongdokhallaga loire. Soiragasu emasingna soihalle haidana thangjanbasu yaowi. Mathangdadi changhan yararoi kaina haiba yaowi. Noina inthi nungaina taktabagini haina eidi adum hai. Tanadraba haise adum hodorabani. Adubu nupisingdi warep loubasida yaohandrasu leibakkini hairadi adum thollakkani. “Ema si issue se leire” hairakpada ngaihak saoningnam magasu eikhoi ‘grong’ haina adum chelle.
Anouba Meerol: Leibakkisu emungisu panabasida nupi singsida wakhalgi awabadi kari kari lei?
Ema Nganbi: Wakhal gi awabadi yamna leiba jatni. Somdana leibak kanningbagi thamoida poki, somdana emung manungi awa-ana. Eikhoinaga horen lak-o si toudoini haibada thoklakaroida matha yaam sai, eikhoi nupana ngangbana maron ama, yum hobana maron ama haina hainaba yaowi. Eikhoidabu madugi wakhalgi awabadu phajillaga chatpagine ngaoraga chatrise.
Anouba Meerol: Masigi wakhalgi awabasi wari tananaba mapham sembagidi kari phibham lei?
Ema Nganbi: Shelter home gumba ama leiragadi aduda wari sanabadu yagadaba. Eikhoinadi leingakta shelter home khara pibiyu haibani. Aduga eikhoigi khunnai sidasu nupisingse kaya punde. Pundribagi maramsu emung manung nani. Nupise leisaringeidadi khara tinnaramgani, mou hek oikhibada maming phao kaonarakae. Nupagidi tinnakhibase nongma hekta ngasidi moigida chatlugey haidana hekta chatli luhonglabasu, macha leirasu. Nupigina adu leitaba, hek chatpada kadai chatlino khangde angang langthokamme, adu toure ada toure hainei. Nupigi potlum sidi yamkhreda. Nupisu luhonga matungda leikaigasu kaya tinnahande. Aduga mari pharabra haibasu nattaba. Mapan thokkanu hairaga adum thamba. Thokaedana nupidunasu eidi sumaina tourene adu toure ada toure ana hek sandokamba. Manungda adum omchaknaraga leihallabanina.
Anouba Meerol: Leibakki ehougi matangsida nupigi thoudang chaona leiragasu enakhunba emungi nupisingdi lairik heiragasu ehou asida kaya yaodabagi mami tarisina karamhaina toubano?
Ema Nganbi: Enakhunba emungi nupisingdi lairik heiragasu sigumba ehougi thabaksi yaoningde. Eikhoigidi karisu wattena haidana adum leiba. Masi Manipur bu oiro malem pumbadadabu oiro sen gi magunsina hingbagi magun asi wangkhathanbani. Aduna sen paiba singdi blockade tourasu chara helloi hairibani. Lairabadi blockade touradi si tare hainaribani. Sigi wakhal sida anise khennarakpani. Aduna enakhunbadi nong churasu wabiba natte, dolan da leiraga makhada phatta haodi marakta chatliba singdu yengibani. Bandh toure, moidi thum packet, morok packet, cheng, hawai loina peiraga thamme. Kotla kotlaga chaba khaktani. Bandh toubada warise lairaba khaktani.
Enakhullaga ehou yaodaba mise emakhoinadi usitte. Ema khoidi moina ngangbasi mawa loude. Basic human rights khangdaba meetanabu moi enakhunbana tourakpada wa ngangba ngamdabagi wani. Eikhoidi enakhunbana eikhoida wa ngangba yade haiba ama lei. Mapan su thoktaba moina dharna gini kaina sen khara piraga moina mapan thoktaba yabro? Leibaksi eikhoi khaktagiro? Madugi lousing du mee khudingmakta piba ngamdabanina enakhunbaga lairabagase sum khennaba. Enakhunbasingsisu mee na ngangise keino khangdana moi soidra loire haidana leikhrabani, officer enakhunba kangbusingse. Eikhoisu mahei pinaba chatkadabasu eikhoi senmitlonsi yamna sonba. Eina doctor, engineer oiraga tolop tu thagi lakh-lakh ta phangba oiragadi chattana khottana touraga mahei pigadoubado ngasigi chanaba leitaba eikhoina kadaidagi sen puthokkakni. Mahei piba haisi khongna chatpa yabamakhei chatlagasu garina chattaba yadaba haiba amasu lei, chaba thakpa haiba amasu changi, chadana koichat chatlaga touba yabadi nattabanina. Adunani meira paibigi mahei-lousing gi thakse nemmibani. Meira paibi sing lairabana anamba oi.
Aduga tolop chaona chaba lairik heiba nupi singdudi warep loubada yaohandragadi masam phoige hairak ani. Eikhoi khara heiba phaobada nupasingda sam phoinabagi thakta lak-ae. Aduga leibakki chenba chongbasu lairaba mayamna oibanina warep loubada eikhoisu yaogadabani haibase haiba ngambani. Lairik heiba professor mari manga dang meira paibi gi member oirabadi, leibakki warep loubada eikhoi yaogani hairakkani. Yaohalloi hairagana eikhoi tonganna toukhragey hairakkani.
Anouba Meerol: Leibakki ehougi phibam si thainagiga hujikka kari khennei?
Ema Nganbi: Thainagi ehouna lambi amada pandam amada chatli, hujikna issue si machet machet mayam ama thoklak ae. Thainagina nisha da Armed Forces ta haidana punna-punna illi. Ahanba nupi lan dana nupasing nektana sijinnaba yaroi haibagi potta tourakpa, 1939 gi nupi lan na chak tangbana thokhalliba, mapanda cheng karigi thadok eno haibasida illakpa. Hujiksina leibak thugaibagi amuk tourak ani, framework agreement ki amuk tourak ani, ILP gi issue amuk tourak ani, Border issue amuk tourak ani. Border issue touringeida ILP du soire. ILP illingeida Framework amuk lak ae. Adagi CAB amuk lak ae. Si mayamsida emasingse adukki matik wai, kokse machet-machet taraboi ningi amuk-amuk khallak padadi.
Anouba Meerol: Hairiba issue mayamsigi marakta hujikse hannadagi changsillakliba phibam asidagi khara semdokke hairagadi kari touba tai haibasida emagi kari mot lei?
Ema Nganbi: Masi emana khanbada warep loubasida nupasingna nupisingse khitang yaohanbiraba, eikhoi mayamna touriba asigi yengaga. Nupa na nupi se masak khangbiba ama change. Nupana nupigi thabaksi karino, eikhoina kamai touna yengadage, hanna leiriba mityengsidi yararoi, anouba mityeng amada khumang chaosinna changsinge hairagadi nupasingsigi wakhal asi khara chumna chat-hanba ei pammi. Aduga eikhoina rally chatpasi kanam thoklak-u yade. Masi leingakna kihanbanani, senmitlon nani. Ei ngasi rally chatluradi ei loubuk chatpagi lupa 200/300 du phangaroi haidana loubukta chatle. Leingakna sinba rally chatpadadi yammeba mee se. Karigino haibada member da sen thadei. Mee porakpada 100/200 yelle. Paisasu phangi achapotsu chai. Warini, thibong laorubei wa natte. Meeoibagi wa siboba, chabasu phajana pijaba sen su phangba aduna phare haina senmitlon gi awaba taraba mee singdi haidoribani. Leijadaba mee di ngasi lupa 200 su phange puksu thanna charakae haidoi natro? Meira paibidi adu yenningai leite. Leingakna thugairakese nupi pradhan member gi quota piba, nupi member sing quota piba. Piriba member singdo leibak ningdanaba haidana noi adumai touragadi sen piroi, noigi program piroi haidana sen sijinnaraga loina thugairakpani. Pradhan nupi singsina scheme sing ga mari leinana thadarak eba sen si moina louraga khangna channaba kharada pinabagi wakhal asi nupana tambirini, leingakna tambirini. Pradhan nupi leppasu nupana chalaiba gumba. Member leppasu nupana chalaiba gumba. Nupi se free da thadoktaba. Nupigi warep loubagi pot asi loinamaksida supchillaga thammibani. Mamingi oinadi nupidu member oire adubu nupa duna yadradi karimta touba ngamde.
Aduna meira paibi wahalliba sonthahalliba asi senmitlon sida sanarakpasu yaori. Aduna leingakna scheme thadharakpada mapham chana lairabagi, lukhrabigi, ahan singi haina mapham chana-chana moina kaktabida niyom chumna thadabirakpa. Moinadi asomda chaona kakhoure, adu khangibanina somdagi meedusu kakninge ne. Mee nadi meira paibisingdo eikhoina meeting tousedi thoklak-u yaroi, wa khannasi adi thoklak-u yaroi haidana haire thoklaktrabanina. Eidi adum hai. nupisingna thoklak taba haise emungi problem ni. Aduda kerosene yennedi thoklakkani, cheng yenni adi thoklakkani hai. Cheng kerosene dugidi nupido warine, nupa duna pusallak tradi nupi duda purucho ana sum thangjandro? Pubagi chatpagi thabaksi nupi duda adum touhandoini.
Manipur gi meira paibi mathouna maringjel leirise leibu leimankhrabani. Masi soihallisi enakhunba mayamnasu soihalle dana, leingak nasu soihalle dana, nupa singnasu soihalle, aduga issue su marol-marol laksallakpa. Masi mayamsigi maraksidani meira paibina litkhatlakesi. Eina hairidi eikhoise warep loubagi thak phaoda chingkhatpiraba, chatliba thabak thouram singse phajana mamut tana khanghanbiraba, aduga nupa ga nupi ga se chap mannaba thakta leirakanda eikhoi thong mannaba khunnai ama oigani haibasi nupana hek khallakpa matamda meira paibi chaokhatlakkani.
Ema Nganbi ga wari-watai sabagi paodam asi Anouba Meerol gi December’19 gi issue da phongjakhibani.
Ruth Chawngthu