Khunnai amagi wakhal-lon amadi kanglup amana amada yengliba mityeng, maru oina hanthana yengbagi mityeng asi, nungti numit khudingi sijinnariba wahei khonpham asida mami tai. Eikhoina sijinnariba lon asida kanglup amagi matangda karamba wahei- wata sijinnari haibasina khunnai asina kanglup aduda karamba mityeng yengbage haibadugi mamisu tai. Hanthana yengba haibasimaktabu khunnai asina semjin-sajinba, kanglup amabu kanglup amana namthaduna thamba ngamnabagi thawongni. Hairiba thawong amasung wakhal-lon asibu chatnabi oina semdorakpada lon-gi achouba thoudang lei. Nungti numit khudingi sijinnaba lon-da kanglup amabu hanthaba mityengda yengbagi wahei-wata sijinnaduna lakpana asigumba wahei-wata amasung masida chelliba wakhal-lon su chatnabi oirak-e. Masina maram oiduna khunnaina semjin-sajinba chatnabi asibu achumba warep amagum louhalli. Masigi hanthana yengba mityengda yumpham oiba amasung kanglup kayabu namthabada thoudang louriba asigumba lon asina kanglup singbu henna namthaba amasung makhoida otpaneibada aranba karisu leitabagum, natraga chatnabi ngakpagum uhalli. Hairiba hanthana yengbagi wahei-wata sing asi khunnai asina hanthana yengliba kanglup singdata nattana awangba thakta thangatliba kanglup masen gi maraktasu sijinnei. Kanglup amana kanglup amabu namthage, ikaiba pige hairagadi makhoina hanthana khanba kanglup amaga changdamnaduna wangaang wata kaya sijinarak-i. Changdamnaba asina maram oiduna hanthaba thakta thamliba kangluppu henna namthaba amasung awangba thakta thamliba kangluppusu hanthaba thakta putharakpaga pangkhak oihalli amasung masina ekaiba tukatchaba pokhalli. Eikhoigi lon asina khunnaina semjin-sajinba asigumba awang-anemgi thak asibu henna mari chet-handuna mannaba khunnai ama purakpada achouba ayetpa ama oihalli. Masina maram oiduna kanglup kharabu namthaba amasung namthaduna leiraba kanglup singbusu henna namthanaba machak oi.
Samna hairabada nupa amagi lamchat-sajat phijet-chakchani haina khunnai asina semjin-sajinduna chatnabi oina yanaba natraga khangnariba adu ngakna chattaba taragdi mahakpu “nupa mandaba”, “nupa thoktaba”, “nupi douna touba”, “homo”, “thekoi nakoi” haibana chingba wahei-wata kaya sijinnaduna mahakpu ekaiba piduna hanthana yengli. Masina nupi amasung khunnaina semjin-sajinba nupagi lichat chattaba nupa singbusu hanthana yengbagi wakhal-lon asi kanagumba nupa amabu ekaiba pibada karamna sijinnabagey haibadu uba phang-i.
Amaromda, nupigi leechat-sajat phijet-chakchani haiba khunnai asina semjin-sajinba chatnabi asigi wangmada chatpa nupi sing da “oktabi”, “lamket lamhaibi”, “lamchat naidabi” haibana chingba wahei-wata sijinnaduna ekaiba piduna henna namthanaba hotnei haina louba yai. Awa ana, imung manung punaba hotnabada pambei leitabadagi haktinnaba bu sendan lambi oina sijinnaribi nupi singbu noknaduna hanthana yengba mityeng adubu takpa wahei khonpham oina eikhoina louba yai.
Asumna nupa amadi nupi oibisingda khunnai asina semjin-sajinba mawong-matou, lamchat-sajat, phijetchakcha ngakna chattaba singbusu “nupira nupi natta” “nupara nupa natta” haiba wahei-wata sijinnaduna yamna hanthaba meetyengda yengi. Masigi meetyeng asina maram oiduna makhoibu otpi-neibiba asi khunai asigi chatnabi ngakpagum uhalli. Asigumba wahei-wata kaya asi sijinnaduna “nupi manbi” amasung “nupa manba” mayambu hanthana yengduna makhoibu khunai asina enthokpagi mami tai. Kanagumba kanagumbi busu ekaiba pige hairadi asigumba wahei-wata sijinnaraga changdamnaduna ekaiba pibagi chatnabi ama sagatlak-e.
Masida nattana khunnai asina semjin-sajinba hingbagi mawong kharatabu chaokhatpani haina lounabana, hairiba mawong asiga chanadaba punsi mahing, phijet, wangang, lamchat pu “chaokhattaba” “lawai taba” haiba wahei-wata sijinnaduna hanthana yengbagi mami tai. Chaokhatpa-chaokhattaba haiba hanthana yengbagi wakhallon asibu henna mara chethanbada asigumba wahei-wata sing asina achouba thoudang louwi. Masina senjao paiba amasung lairaba singi marakta leiriba khennaba asi henna chaothok-halli. Asigumba wahei-khonpham asina lairaba singbusu henna namthabada amasung senjao paiba singi punsi marelbu chaokhatpani haina lounahanbada achouba thoudang louri.
Khara amuk munna yengsillubada karigumba asok apan nangkhibadagi natraga attopa maram khara dagi hakchang gi kayat khara meeyamga manana sijinnaba ngamkhidaba meewoi singbu “soinaiba”, “mittangba”, “napangba”, “khongtekpa” haibana chingba wahei-wata sijinnaduna hanthaba meetyengda yengi. Masida nattana kanagumba masagi kayat pumba meeyamga mannana sijinnaba ngamba meewoidasu karigumba matamda cheiba nattraga ekaiba piba matamda hairiba wahei-wata sing-asi sijinnei. Eikhoina sijinnariba wahei-wata sing asida atamnaba meeyoi kanglup amabu atonbani amasung meeyamga mannadaba ni haina khalli haibagi mami tai. Amasung sijinnariba wahei-wata asina hairiba khennaba thamba wakhal-lon asibu henna mara chet-handuna chatnabi gum uhalli.
Aroibada, meewoibagi khunnaina otpa-neibada aranba ni haina khannadaba kanglup ama hairagadi saa-nga gi kanglup asini. Makhoida hanthana yengbagi mityeng amasung wakhallon asi eikhoina numit khudingi sijinnaba londadi yaamna mami sengna tai. Kanagumba amabu saa ga changdamnaba haibasi misak adu khwaidagi hanthaba thakta puthabaga pangkhak oina lounei. Asigumba khunaina semjin-sajinba meewoiba amasung saa gi khennaba amadi ani sigi marakta leiba awang-anemgi thaak asi eikhoigi wahei watadasu mami tai. “Oak manba”, “gadha chuba”, “hui gumba”, “saa san-gum koichat chatpa”, “ekai khangdaba houdong-gumba”, “saa nga gum otpa” haibanachingba wahei-wata kaya sijinnaduna meeoiba amasung saa gi awang- anemgi thaak asibusu chatnabi oihalli amasung saa-nga da otpa neiba toubada aranba karisu yaodabagum uhalli.
Eikhoigi wakhallon amadi khunnai asigi chatnabi sing gi mammi eikhoigi wahei -wata da tai haibada haimanba thokloi. Anouba khunnai ama semgatnaba wahei-wata lon-li semdokpana nungti numit khudingi ahongba ama purakpada achouba thoudang ama leigani khalli. Maram asina khunai asida leiriba anem-awang amadi hanthana yengbagi mityeng kaya asi muthat-tuna mannaba khunai ama purakpada eikhoina wakhal khanthaduna nungti numit khudingi sijinnariba wahei-wata sing asisu semdokpa ama changani.
Wareng asi Anouba Meerol gi 2019 gi May thagi chefong da phongjakhibani.
WeRetrospect 
Ruth Chawngthu